Өнгөрсөн амралтын өдрөөр буюу 8 сарын 10-11- нд Үндэсний Цэцэрлэгт хүрээлэнд  Шри Чинмойн нэрэмжит 6, 12, 24 цагийн гүйлтийн улсын аварга шалгаруулах тэмцээн болж өндөрлөлөө.

   Тэмцээнийг Нийслэлийн спортын хороо, Монголын хэт холын марафон гүйлтийн холбоо, Үндэсний цэцэрлэгт хүрээлэн, Шри Чинмойн марафоны баг зэрэг байгууллагууд хамтран зохион байгууллаа. Тус тэмцээн 15 дахь жилдээ явагдаж байгаа бөгөөд 6, 12, 24 цагийн төрлөөр 20-34, 35-49, 50-аас дээш насны ангилалд Увс, Хөвсгөл, Булган, Орхон, Сэлэнгэ, Дархан-Уул, Өмнөговь, Дундговь, Дорнод, Сүхбаатар, Төв зэрэг аймаг, нийслэлээс нийт 92 тамирчин хурд хүч, тэсвэр хатуужлаа сорин оролцжээ. Мөн АНУ-ын Техас мужаас Peter Benneth, Yen Nguyen зэрэг холын зайн гүйлтийн туршлагатай хоёр тамирчин гүйжээ.

 Тамирчид тухайн насны ангилалд 6, 12, 24 цагийн хугацаанд хамгийн хол зайг туулсан нь ялагч болсон байна. Тэмцээний зам нь 1000 м-ийн тойргоор явагдаж шүүгч, эмч, массажист, үйлчилгээ зэрэг 40 гаруй бүрэлдэхүүнтэй баг 24 цагийн турш ажиллажээ.

Тэмцээний 24 цагийн гүйлтийн /эрэгтэй 35-49 нас/ ангилалд ОУХМ Д.Амгаланжаргал Монгол улсын рекорд амжилтыг 236.877 км-ээр шинэчлэн тогтоолоо. Өмнөх рекордыг 2017 онд Хятдад болсон А зэрэглэлийн тэмцээнд ОУХМ П. Отгонбаатар 223.435 км гүйж эзэмшиж байжээ.                                              Түүнчлэн 12 цагийн гүйлтийн /эмэгтэй 20-34 нас/ ангилалд СМ Б.Сарангуа 123.5 км гүйж улсын рекордыг шинэчиллээ. Өмнөх рекордыг 2018 онд Тайваны Азийн АШТ-д Г.Уугантуяа 118.175 км гүйж тогтоосон байна.

Байгууллагын дүнгээр Орхон аймгийн Хангарьд Спорт хорооны баг тэргүүн байр, Онцгой байдлын ерөнхий газрын баг тамирчид дэд байр, “I run клуб” –ын тамирчид удаахь байрт шалгарчээ.