ШРИ ЧИНМОЙН '"ӨӨРИЙГӨӨ ЯЛАХ" 6/12/24 цагийн гүйлт Үндэсний цэцэрлэгт хүрээлэнд амжилттай болж өндөрлөлөө. Тэмцээнд IRun, Let's Run, PRunning Club, Зэвсэгт хүчний 150-р анги, Mongolian Eco Runners, Дорнод аймаг, ХЗДХЯ, Mongolian Elite Runners, Мазаалай клуб зэрэг багаар болон хувиараа нийт 45 гүйгч оролцон өөрсдийн дотоод нөөц бололцоогоо дайчлан өдөр шөнөгүй гүйж барианд орлоо.

6 ЦАГИЙН ГҮЙЛТ: Нийт 25 гүйгч оролцсон бөгөөд тэмцээний хамгийн хурдан мөн хамгийн ширүүн өрсөлдөөнийг үзүүллээ. Эхний 3 цагийн байдлаар 10 гүйгч 1-2 тойргийн зайтай гүйж байлаа. Сүүлийн 3 цагт яван чангарсаар Спортын дэд мастер Увс аймгийн Хурд клубын тамирчин О.МАРГАД-ЭРДЭНЭ 9 тойргийн илүүтэйгээр нийт 74.23км замыг туулж тэргүүн байрыг эзэллээ. Түүний ард насныхаа ангилалд Тэргүүн байр эзэлсэн Г.ЭРДЭНЭБОЛД 65.465км гүйсэн байна. Харин эмэгтэйчүүдээс хамгийн хол зайг туулсан нь тэмцээний турш нэгэн жигд хэмнэлээр гүйсэн I Run Mongolia клубын тамирчин А.Энхцэцэг  65.49км-р тэргүүллээ.

12 ЦАГИЙН ГҮЙЛТ:  Оройн 10 цаг болж байна. Цэцэрлэгт хүрээлэнд хүний хөл хөдөлгөөн багасаж бүгд гэр гэр лүүгээ харьж байлаа. Харин манай 12 цагийн гүйгч нар маань гүйхэд бэлэн гарааны зурвас дээр зогсож байна. Гараанаас нийт 10 гүйгч гарч 24 цагийн гүйгч нартай хамт хөл нийлүүлэн гүйлээ. Тэмцээний турш нэгэн жигд хурдтай гүйсээр Mongolian Elite Runners Club тамирчин Ж.ЗУНДУЙ-ЁНДОН 94 км-р тэргүүн байрыг эзэлсэн юм. Харин эмэгтэйчүүдээс тэмцээнийг Дархан хотоос зорьж ирсэн Шри Чинмой Марафон багийн тамирчин Са.Оюунгэрэл 65 км-р хамгийн хол зайг тууллаа. 2-р байранд тус тэмцээнд өглөө нь 6 цаг гүйж насны ангилалдаа Тэргүүн байр эзэлсэн Ц.Буянаа байлаа. Тэрээр өглөө нь 38.298км гүйсэн бол шөнө нь 44.85км гүйжээ.

24 ЦАГИЙН ГҮЙЛТ: Олон баатрууд байдаг. Тэдний дундаас 24 цаг гүйж ӨӨРИЙГӨӨ ЯЛСАН баатрууд хамгийн онцгой. Тэд өглөө 10 цагт 6 цагийн гүйгчидтэй хамт гүйж эхэлсэн. 6 цагийн гүйлтийн тэмцээн дууссан ч тэд 10 уулаа үргэлжлүүлэн гүйсээр байлаа. Бороо орсон ч тэд гүйсээр байсан. Нар гарсан ч тэд гүйсээр. Нар бууж бүрий болсон ч тэд гүйсээр. Хот гүн нойрондоо автаж байхад тэд гүйсээр л байлаа. 24 цагийн турш гүйнэ гэдэг тоглоом биш гэвч тэд үүнийг хийж чадлаа. Өчидөр өглөө 10 цаг эхэлсэн гүйлт Өнөөдөр өглөө 10 цаг болход дууслаа. Энэ урт аялалд хамгийн хол зайг АНУ-д болсон 6 өдрийн гүйлтийн Дэлхийн аваргад 2-р байранд орсон Б.БАЯНМӨНХ 146 км гүйж тэргүүлсэн бол түүний дараа тус тэмцээний байнгын оролцогч Т.БАЯСГАЛАН 134 км гүйв. Харин эмэгтэйчүүдийн хамгийн хол зайг ОУХМ Мазаалай клубын тамирчин Л.ГАНДОЛГОР 136 км гүйсэн байна. 

Энэ тэмцээнд орж Өөрийгөө хэтийдэн давж өөртэйгөө уралдсан бүх гүйгч тамирчиддаа ТАЛАРХАЛ, Халуун баяр хүргэе!

 

There are only three winners:

The one who Competes with himself,

The one who Crosses the finish line first

And the one who Finishes the race.

                                             Sri Chinmoy